बालेनको निर्देशन अनुसार भदौ अन्तिमसम्म तयार हुन्छ त कृष्णभीरको सडक ? यस्तो छ कामको गति

काठमाडौं । पृथ्वी राजमार्गअन्तर्गत भोटेकोशी बाढी र पहिरोका कारण अवरुद्ध बनेको कृष्णभीर सडक भदौ महिनाभित्रै सञ्चालनमा ल्याउने लक्ष्यसहित सरकारले निर्माण कार्य तीव्र पारेको छ।

प्रधानमन्त्री वालेन्द्र शाहले भदौ १७ गते प्रतिनिधिसभामा सम्बोधन गर्दै भदौ मसान्तभित्र कृष्णभीरको सडक निर्माण सम्पन्न गरी यातायात सहज बनाउने लक्ष्य रहेको बताएका थिए। सोही लक्ष्यअनुसार अहिले कृष्णभीरमा दिनरात निर्माण कार्य अघि बढाइएको हो।

Advertisement:

कृष्णभीरमा पहाड काटेर करिब २५० मिटर नयाँ ट्रयाक निर्माण गर्न १० वटा मेसिन र ३० जना जनशक्ति परिचालन गरिएको छ। सशस्त्र प्रहरी बल, नेपालले निर्माण क्षेत्रमा फ्लडलाइट जडान गरिदिएपछि रातको समयमा समेत काम भइरहेको छ।

निर्माणस्थलमा दैनिक १२ देखि १४ घण्टासम्म काम भइरहेको बताइएको छ। नयाँ ट्रयाक निर्माणसँगै सम्भावित पहिरो रोकथामका लागि सडकको माथिल्लो र तल्लो दुवैतर्फ पनि काम भइरहेको छ।

कृष्णभीरसँगै पृथ्वी राजमार्गका अन्य पाँच स्थानमा खसेका पहिरो हटाउने र दुईतर्फी यातायात सञ्चालनमा ल्याउने कामसमेत समानान्तर रूपमा अघि बढाइएको छ।

चार दिनको अध्ययनपछि नयाँ ट्रयाकको विकल्प

भदौ १० गते आएको बाढीका कारण कृष्णभीर क्षेत्रको सडक कमजोर बनेको थियो। त्यसपछि भदौ १४ गते भोटेकोशीको बाढीले सडक थप भासिएपछि सरकारी टोलीले सोही दिन स्थलगत निरीक्षण गरेको थियो।

सडकको अवस्था गम्भीर बनेपछि प्रधानमन्त्री शाह र पूर्वाधारमन्त्रीबीच तत्काल मर्मत तथा वैकल्पिक सडक निर्माणबारे छलफल भएको थियो।

त्यसपछि सडक विभाग र नेपाल जियोटेक्निकल सोसाइटीका प्राविधिकले चार दिनसम्म द्रुत अध्ययन गरेका थिए। अध्ययनपछि कृष्णभीरको पहाड काटेर करिब २५० मिटर नयाँ ट्रयाक निर्माण गर्नु तत्कालका लागि उपयुक्त विकल्प हुने निष्कर्ष निकालिएको थियो।

अबको प्रश्न: भदौभित्रै काम सकिएला ?

सरकारले भदौ मसान्तभित्रै सडक सञ्चालनमा ल्याउने लक्ष्य राखेको छ। त्यसका लागि निर्माणस्थलमा मेसिन र जनशक्ति थप परिचालन गर्नुका साथै रातिसमेत काम भइरहेको छ।

तर, पहाड काटेर नयाँ ट्रयाक निर्माणसँगै सडकको माथि–तल पहिरो रोकथामका काम पनि गर्नुपर्ने भएकाले भदौ अन्तिमसम्मै सम्पूर्ण काम सम्पन्न गरेर सुरक्षित रूपमा यातायात सञ्चालन गर्न सकिने हो कि होइन भन्ने विषय भने कामको वास्तविक प्रगतिमा निर्भर हुनेछ।

हालको गति हेर्दा लक्ष्य पूरा गर्न निर्माण टोलीले अधिकतम जनशक्ति र उपकरण परिचालन गरिरहेको छ। अब बाँकी रहेको समयमा २५० मिटर नयाँ ट्रयाक निर्माण, सडक संरक्षण तथा अन्य अवरुद्ध स्थानको व्यवस्थापन कति प्रभावकारी रूपमा सम्पन्न हुन्छ भन्नेले सरकारले घोषणा गरेको भदौ मसान्तको समयसीमा पूरा हुन्छ कि हुँदैन भन्ने निर्धारण गर्नेछ।